REBAP, CDO magtambayayong alang sa lig-on nga ekonomiya -Goking

DAKONG kalamboan ang gilaoman sa natad sa pabalay ug patigayon sa dakbayan sa Cagayan de Oro human gipalig-on ni Konsehal George Christopher Goking, chairman sa komite sa trade and commerce, ang pakig-alayon sa mga Real Estate Brokers Association of the Philippines (REBAP).

Isip nagrepresentar ni Mayor Rolando “Klarex” Uy, mainitong giabiabi ni Konsehal Goking ang mga delegado sa REBAP Metro CDO Officers Rochie Lorono (Treasurer) ug Josephine Solijon (VP for Business); ug REBAP National Officers Carla Calleja (President), Mary Jane Vicente (Internal), Richard Uy (Treasurer) ug real estate service practitioners sa nasod.

Gipadayag ni Konsehal Goking ang iyang dakong pagpasalamat sa maong sektor kay dako og papel ang mga real estate brokers sa paggiya sa mga investors ug pagdani og mas daghang kapital nga mosulod sa syudad, ilabi na karon nga naila ang Cagayan de Oro isip nag-unang economic ug investment hub sa Northern Mindanao.

Gisentro sa maong tigom ang pagpahiuyon sa mga kalamboan sa real estate ngadto sa mas dako nga mga tumong sa ekonomiya.

Nag-abri usab kini sa dalan alang sa mas lig-on nga kooperasyon uban sa Oro Trade and Investment Promotion Center (OroTIPC) ug sa City Tourism and Cultural Affairs Office.

Gipasalig sa konsehal nga bukas ug andam kanunay ang kagamhanan, ubos sa pamunoan ni Mayor Uy, sa pakig-alayon sa mga real estate brokers aron masiguro nga hapsay, makiangayon, ug mapuslanon alang sa tanan ang mga palisiya sa pabalay, zonal valuation, ug ang hisgotanan sa real property tax.

Pinaagi sa maong panagtigom, gilauman nga mas molig-on pa ang public-private partnership (PPP) tali sa kagamhanang lokal ug sa real estate sector aron makab-ot ang malungtarong paglambo, pagmugna og dugang trabaho, ug paghatag og de-kalidad nga pabalay alang sa mga lumulupyo sa dakbayan. (RNQ/SP)