Walo ka mga tunghaan sa syudad makutayan og linya sa kuryente

Dugang kalamboan ang gilantaw nga matagamtaman sa kabataan sa pipila ka barangay ning dakbayan.

Kini human gipundohan sa konseho sa syudad ubos ni Bise Mayor Bebot Rodriguez ang proyekto balor P1 ka milyon alang sa pag-instalar sa linya sa kuryente diha sa mga bag-ong matukod nga edifisyo sa Macapaya Elementary School, Midkiwan Integrated School (IS), Balongkot IS, Cadayonan IS, Dungguan IS, Iba IS, Palalan IS ug Baluarte IS.

Kini ang kauban sa mga proyektong nasukip sa giaprobahang 2023 Annual Investment Plan (AIP) sa konseho sa syudad ubos sa Special Education Fund (SEF).

Niini, dako ang pasalamat ni Konsehal Suzette Magtajas-Daba sa administrasyon ni Mayor Klarex Uy sa padayong paglantaw nga walay mapihig sa itunol nga serbisyo alang sa dugang kalamboan sa mga kabataan sa dakbayan.

Siya midugang nga dako kaayo ang ikatabang kun adunay elektrisidad ang dapit kay gawas sa paghatag og mas de kalidad nga edukasyon mas mapalapad ang pamaagi sa pagtudlo tungod sa makuha nga mga bag-ong teknolohiya ug ma-aplay ngadto sa tanang kabataan.