Walay angay kahadlokan sa pagtukod sa bag-ong City Hall - Konsehal Cabanlas

SOBRA na ang paghulat sa dakbayan aron matukod ang bag-ong City Hall.

Kini ang giluwatang pamahayag ni Konsehal Edgar Cabanlas atol sa sesyon sa Konseho niadtong Lunes nga gidumala ni Bise Mayor Bebot Rodriguez.

Gihimo ni Cabanlas ang maong panahom human gikwestiyon ang resolusyon nga naghatag og panugot kang Mayor Klarex Uy nga makig-negotiate sa mga banking institution aron mag-loan ang syudad ug gastohon sa pagtukod sa gisugyot nga proyekto.

Matod ni Cabanlas, sayon ra gyod unta matubag ang mga pangutana ug kabalaka kon gipadayag pa kini atol sa tigom sa komite sa pamalaod niadtong Biernes. Gipasabot niya nga mitambong atol sa maong tigom ang Technical Working Group (TWG) ug mga resource person sama kang Dr. Babia nga andam motubag base sa mga datos kalabot sa feasibility, viability, ug ang kapasidad sa dakbayan sa pagbayad sa maong loan.

Gibutyag ni Konsehal Cabanlas nga dugay na kini nga gitinguha bisan sa mga nangaging mayor apan wala lang mahatagi og kahigayonan tungod sa kakulang sa pag-insister apan karon ubos sa pamunoan ni Mayor Klarex Uy, iyang gihingusgan ang maong proyekto tungod kay nabiyaan na ang Cagayan de Oro bisan sa gagmay nga mga dakbayan sa nasod tungod sa kakulangon sa pagtunol sa saktong serbisyo ngadto sa customer kinsa mao usab ang mga magbubuhis sa gobyerno.

Gipasalig ni Cabanlas sa publiko ug sa iyang mga kauban sa Konseho nga taas pa ang proseso sa maong proyekto ug walay angay nga kahadlokan.

Bahin sa kabalaka kon makawat ba ang maong pundo, iyang gipasabot nga duna kitay mga safeguard institution sama sa Commission on Audit (COA) nga maglantaw niini, gawas pa naa ang Konseho mismo nga magmabinantayon sa pagtukod sa maong imprastraktura. (JRG/SP)