Unang IP Peoples Day gilusad sa kagamhanan

SINGGIT sa kalipay ug pasalamat ang gipadayag sa komunidad sa mga Higaonon human ang lokal nga kagamhanan sa Cagayan de Oro naglusad sa labing unang IP People’s Day niadtong Miyerkules, Oktubre 7, 2026.

Ang maong kalihokan gipahigayon dungan sa pagsaulog sa 29th National Indigenous People's Month karong bulana diha sa City Hall diin nikabat sa 2,382 ka Higaonon ang nakaapil ug nakapahimulos sa nagkalain-laing serbisyo sa gobyerno.

Tumong sa kalihokan ang paghatag og direktang pagtagad ug dinalian nga tabang sa mga panginahanglanon sa maong sektor.

Si City IPMR Konsehal Roberto Cabaring, chairman sa komite sa cultural affairs sa konseho, mipaabot sa iyang tiunay nga pasalamat ngadto kang Mayor Klarex Uy tungod sa iyang walay puas nga pagpangga ug pagpalig-on sa mga programa alang sa mga lumad sa dakbayan.

Pinaagi sa maong kalihokan, napamatud-an nga nagpabilin nga prayoridad sa kagamhanan ang kaayohan sa mga kaigsoonang IPs sa Cagayan de Oro. (JRG/SP)