VM Bebot Rodriguez misugyot og dugang benepisyo sa Lupong Tagapamayapa

GIPRESENTAR ni Vice Mayor Bebot Rodriguez sa komitiba sa barangay affairs ang usa ka proposed ordinance nga nagtumong sa paghatag og dugang benepisyo ug insentibo sa mga sakop sa Lupong Tagapamayapa sa mga barangay sa Cagayan de Oro.

Una nang gisang-at ni Vice Mayor Bebot ang maong sugyot niadtong 2023. Segun sa maong sugyot, 24 ka benepisyo ug insentibo ang itunol ngadto sa mga sakop sa Lupon nga naglakip sa financial benefits ug allowances; insurance, health ug retirement benefits; scholarships, employment, housing ug livelihood opportunities; legal protection, training ug recognition; ingon man suporta alang sa equipment, negosyo, ug professional development.

Sa iyang bahin, hugot nga gisuportahan ni Konsehal Gigi Go, chairperson sa komitiba sa senior citizens, ang maong proposal, ug midugang nga adunay mga senior citizen nga nagsilbi usab isip mga miyembro sa Lupon sa ilang tagsa-tagsa ka barangay. Matod niya, adunay mga Lupon member nga ₱500 hangtod ₱700 ra ang madawat nga incentive matag bulan.

Matod ni Go nga ang gisugyot nga P1,000 isip minimum City Financial Assistance kada bulan mahimong dugang nga tabang sa mga miyembro sa Lupon, ilabi na sa mga senior citizen nga nagpadayon sa pagserbisyo isip Lupon members.

Gisuportahan usab ni Councilor Marlo Tabac, chairperson sa committee on barangay affairs ug presidente sa Liga ng mga Barangay, ang gipasaka nga ordinansa ni Bise Mayor Bebot.

Matod ni Tabac nga ang panginahanglan og dugang suporta alang sa mga miyembro sa Lupon usa sa mga concern nga ilang nadawat atol sa bag-ohay lang nga Lupon training.

Ang maong proposed ordinance ni Bise Mayor Bebot giduso ni Konsehal Tabac ngadto sa City Legal Office ug Local Finance Committee alang sa dugang pagtuon ug rekomendasyon. (SPE/SP)