VM Bebot nangusog masabtan problema sa mental health
Dako ang panghinaut ni Bise Mayor Bebot Rodriguez nga masabtan sa tanang Kagay-anon ang kamatuoran sa problema sa mental health. Mao kini ang gipadayag sa bise mayor atubangan sa mga kawani sa konseho sa syudad sa iyang pagpasabot paunsa mapakgang ang mga insidente sa paghikog sa kabatan-onan.
"Tinuod gayud ang problema sa mental health, usa kini sa akong kawsa ug angayang ato kining mabantayan, mapangitaan sa solosyon aron masalbar ang kinabuhi sa usa ka biktima sa maong sakit", padayag sa bise mayor.
Niini, siya mibutyag sa mga angayang bantayan ug matikdan nga mga kausaban sa batasan o’ lihok sa usa ka miembro sa pamilya. Matod niya nga red flag na sa usa ka ginikanan kun ang anak nga kanhi malipayon ug mahilig nga makighinabi magpuyo na lamang sulod sa kwarto, dili na ganahan mokaon, dili makakatulog ug dili na makigkuyog sa mga amigo o’ amiga.
"Kitang mga ginikanan ang nakahibalo sa batasan sa atong mga anak busa ako nanuktok sa inyong mga kasingkasing nga magmabinantayon sa mga panghitabo sa panimalay. Makighinabi sa mga bata aron masayran kun adunay gihambin nga kalisdanan", pangamuyo ni Bise Mayor Bebot.
"Ang kahibalo nga atong makuha kalabot sa problema sa mental health atong ipaambit sa uban aron tanan masayod ug mahitsas sa mga angayang buhaton pag-abag sa mga biktima sa maong sakit", panawagan ni Bise Mayor Bebot Rodriguez.
