VM Bebot misuporta sa sugyot moratorium sa pass-through fees

PABORABLENG gisuportahan ni Bise Mayor Bebot Rodriguez ang sugyot nga masuspende ang pagpahamtang sa lokal nga kagamhanan sa mga balayronon ngadto sa mga sakyanan nga magkarga og pagkaon.

Sa tigom sa Komite sa Public Utilities ni Konsehal Romeo Calizo kagahapong adlawa, gipasabot ni Bise Mayor Bebot nga ang Kapunungan sa mga Bise Mayor sa tibouk nasud nagkahiusa dinha sa pagsuporta sa Executive Order No. 41 ni Presidente Bongbong Marcos nga nagdili sa pagpangolekta pass-through fees dinha sa mga national roads ug nagsuspende sa pagpangolekta sa bisan unsang matang sa balayronon sa lokal nga kagamhanan sa tanang klase sa sakyanan nga magkarga og pagkaon.

Dako ang iyang pagtuo nga ang maong lakang makatabang nga maminusan ang galastohon dinha sa pabiyahe sa mga pagkaon ilabina sa mga utanon, isda ug karne. Sa maong higayon, posibleng makunhuran usab ang presyo sa mga palaliton.

Sa iyang bahin, si Konsehal Ian Achas mibutyag nga ang gipakanaug nga executive order sa presidente bunga sa hangyo sa mga byahero nga mapanas ang maong matang sa koleksyon nga nakadugang sa ilang galastohon dinha sa pagbiyahe sa mga produkto.

Hinuon, siya mibutyag nga dinhi sa dakbayan sa Cagayan de Oro, wala siyay namatikdang koleksyon nga gipahamtang ngadto sa mga byahero sama sa ubang mga lokal nga kagamhanan.