Undas 2026: Disiplina ug pag-amping, panawagan ni Konsehal Suan

NANAWAGAN si Konsehal Aga Suan, minority floor leader sa konseho,  sa tanang Kagay-anon nga hatagan nila sa prayoridad ang kaluwasan ug disiplina atol sa pagsaulog sa kalagkalag.

Matod ni Suan, aron masiguro nga hapsay ang pagbisita sa mga sementeryo, kinahanglan ang pagplano og sayo ug pagtuman sa mga lagda sa komunidad.

Ania ang pipila ka pahimangno sa konsehal:

- Dili kalimtan ang pagpalong sa mga linya sa kuryente ug seguroon nga way nakasaksak  sa mga outlet sa dili pa mobiya sa panimalay aron malikayan ang disgrasya sa sunog.

-Likayan ang pagdala sa gidili nga mga butang sulod sa sementeryo sama sa ilimnong makahubog, hait nga hinagiban, ug mga speaker nga makadisturbo sa uban.

-Dili magpataka og labay sa mga basura aron magpabilin ang kalimpyo sa sagradong dapit sa mga minatay.

"Ang Undas usa ka panahon sa pag-ampo ug paghinumdom. Atong selyohan kini pinaagi sa pagka-responsableng lungsuranon alang sa kaluwasan sa tanan," sumpay ni Konsehal Suan. (RNQ/SP)