Turnover sa 4-storey 42-classroombldg sa Cugman High karong adlawa


SI Konsehal Suzette Magtajas-Daba, chairman sa Komite sa Edukasyon, mipasalamat sa kagamhanan sa dakbayan ug sa administrasyon ni Mayor Oscar Moreno nga taliwala sa pandemya nagpadayon ang panglantaw alang sa dugang kalamboan sa katawhan sa dakbayan.

Kini human gitakdang itunol karong alas 2 sa hapon pabor sa Department of Education (DepEd) ang bag-ong upat ka andanang edipisyo (with roof deck) nga adunay 42 ka mga lawak saringan sa Cugman National High School.

Si Konsehal Suzette mibutyag nga ang maong edipisyo ubos sa tinguha sa administrasyon ni Mayor Oscar Moreno nga walay kabataang mapihig ug tanan makaangkon sa de kalidad nga edukasyon.

Nasayran nga kasamtangang anaa na sa 816 ka mga lawak saringan ang natukod sa syudad gamit ang pundo sa Special Education Fund (SEF) nga hitsas sa facilidad aron maseguro nga matunol ang hamugaway nga mga edifisyo.

Dako ang kalipay sa konsehal nga pinaagi sa mga bag-ong edifisyo mahatagan og dakong tabang ang mga magtutudlo ug maandam ang kabataan sa pagpanumbalik sa face to face classes.

Walay rason nga dili makaeskwela ang kabataan kay anaa naman gyud sa ilang tugkaran ang mga tunghaan nga maghatag kanila og dugang kaarangan sa kinabuhi, pamahayag ni Konsehal Suzette Magtajas-Daba. (SP/RNQuiblat)