Tugkaran ko, Limpyohan ko program sa Nazareth gisuportahan sa Konseho

HINGPIT nga mabatunan ang kalimpyo  sa bisan asang tugkaran sa Barangay Nazareth ning dakbayan.

Kini human ang Konseho sa sesyon niadtong Lunes nga gidumala  ni Presiding Officer Pro Tempore Konsehal Romeo Calizo mipalabang sa resolusyon  nga nag-uli sa ordinansa sa  maong barangay.

Kini nag-amendar sa Chapter 32 sa ilang Barangay Codified Ordinance nga nagmando  sa tanang tag-iya o okupante sa panimalay, mga magpapatigayon ug mga publikong buhatan  alang sa pag-obserbar sa “Tugkaran Ko, Limpyohan Ko” program ug nag-imposar og multa sa masapong makalapas.

Gipasabot sa barangay nga ang paningkamot sa barangay sa pagmintinar sa kalimpyo  sa kadalanan, sidewalks ug sa canal dili magmalamposon kon walay  igong tabang ug kooperasyon  sa mga residente sa barangay.

Matod pa nga  gikinahanglan nila ang kooperasyon sa tanan  aron madiskorahe ang pagpataka og labay sa mga basura.

Ang resolusyon nga gipalabang sa konseho alang sa maong katuyuan gipaluyohan sa komite sa barangay affairs ni Konsehal Yan Lam Lim ug komite sa  pamalaod ug reglamento ubos ni Konsehal Edgar Cabanlas.