top of page

Training sa mga tinun-an sa Bright Horizons dihas Residential Care for the Elderly giuyonan

Hugot nga gisuportahan sa konseho sa syudad ubos ni Bise Mayor Bebot Rodriguez ang tinguha sa Bright Horizon Caregiver Training Hub and Technical School Inc. (Bright Horizon) nga mopailalom sa On the Job (OJT) ang ilang mga tinun-an sa usa sa mga fasilidad sa syudad.


Kini human ang konseho sa sesyon niadtong Lunes hiniusang mipalabang sa ordinansa nga naghatag og katungod ni Mayor Klarex Uy pagpirma sa Memorandum of Agreement (MoA) tali sa Bright Horizon kalabot sa pagpahigayon og OJT sa mga tinun-an ug trainees ubos sa TESDA-TVET 11 Qualification – Caregiving NCII diha sa Residential Care for Elderly sa Maitum, Puerto.


Sa maong MoA, gipadayag sa maong institusyon ang ilang kaakuhan pagpahigayon sa Flexible Learning Program gamit ang Parameter 4-Combination of Distance Learning ug Face to Face subay sa TESDA Circular No. 062-2020 uban sa mga residente sa maong fasilidad.


Dugang pa, gipaninguha usab sa maong institusyon nga mapalambo ang kahibalo ug kahanas sa ilang mga caregivers diha sa pagtunol og suporta ug tabang aron mamintinar ang dekalidad nga pag-amuma sa katigulangan nga anaa sa maong fasilidad.


Samtang ang maong pagtambayayongay, dako usab og ikatabang sa kagamhanan dinha sa malungtaron nga pagproteher sa marginalized ug vulnerable sector sa komunidad aron mahimong masaligon sa ilang kaugalingon ug mabuntog ang kadina sa pagkaulipon sa kapobrehon.


Ang ordinansa nga gipalabang sa konseho alang sa maong katuyuan gipaluyuhan ni Konsehal Roger Abaday.


コメント


bottom of page