Task Force batok improvised muffler gimugna

GISUPORTAHAN ni Konsehal Eric Salcedo, chairman sa komite sa public utilities, ang pagmugna og task force nga pagalangkuban sa Roads and Traffic Administration, Land Transportation Office, Cagayan de Oro City Police Office, Highway Patrol Group, Regulatory and Compliance Board ug Association of Barangay Council kansang tahas mao ang pagsikop sa mga sakyanan nga naggamit og mga improvised muffler nga nakahatag og disturbo sa katawhan panahon sa kagabion ug pagsumpo sa gakahitabong drag race dinhi sa dakbayan.

Sumala ni Konsehal Salcedo nga makatabang usab kini aron maminusan ang sunod-sunod nga aksidente sa kadalanan nga mikalas sa pipila ka kinabuhi kay mataha o mahadlok naman ang mga motorista tungod sa himoong masubsob nga operasyon sa maong task force.

Nunot niini hiniusang giuyonan sa komite ang resolusyon nga nagmugna og task force alang sa nasangpit nga katuyoan. (MLR/SP)