top of page

Tano gitudlong ambassador of goodwill ngadtos USA

Ang konseho sa syudad ubos ni Bise Mayor Bebot Rodriguez hiniusang misagop sa resolusyon nga nagtudlo ni Herna Francis Mae Tano isip Ambassador of Goodwill ngadto sa Estados Unidos (USA). Si Konsehal Suzette Magtajas-Daba, chairman sa komite sa edukasyon ug usa sa nagpaluyo sa gipasakang resolosyon, mibutyag nga si Tano usa sa mga unang benepisaryo sa City College Scholarship Program human kini gipalapdan ubos sa City Scholarship Code of 2018.


Si Tano migradwar nga Magna Cum Laude ug midawat sa Dr. Ricardo E. Rotoras Outstanding Leadership Award sa University of Science and Technology of Southern Philippines (USTP). Ang byahe ni Tano paingon sa Estados Unidos kabahin sa Academic Fellowship sa Young Southeast Asian Leaders Initiative Professional Fellows Program (YSEALI PFP) nga gipasiugdahan sa United States Department of State Bureau of Educational and Cultural Affairs.


Ang makanunayong pagka-scholar leader ni Tano ubos sa mentorship sa buhatan sa City Scholarship sa panguna ni Ritchel Petalcorin-Dahay ug kalantip sa salabutan ang rason nga makaadto siya sa University of Texas, Houston, USA sa Marso 25 hangtod Abril 29, ning tuig.


Niini, si Tano gihatagan sa kahigayonan nga makamatikod sa mga modernong pamaagi, palisiya ug mga programa sa dapit nga magdala og kalamboan sa natad sa edukasyon dinhi sa syudad. Ang resolosyon nga gisagop sa konseho alang sa maong katuyoan gipaluyohan ni Konsehal Suzette Magtajas-Daba uban sa tanang sakop sa konseho.




Comments


bottom of page