Taho mahitungod illegal mining dihas Tumpagon paimbestigahan ni Abaday

SI Konsehal Roger Abaday, Chairman sa Komite sa Environment sa Konseho, nangusog maimbestigahan  ang impormasyon nga nadawat kalabot sa mga Chinese nationals  nga giingong nagpahigayon og illegal nga operasyon sa pagmina diha sa Barangay Tumpagon ning syudad.

Sa tigom sa komite niadtong Biernes, si City Local Environment and Natural Resources  Officer Engr. Armen Cuenca  mitaho sa komite sa gipadangat sa usa ka  concerned citizen  pinaagi sa Facebook Messenger mahitungod sa giingong illegal mining operation  diha sa maong barangay.

Si  Kapitan Cecilio Dagsaan sa Tumpagon mikompirma nga ilang nakita ang presensya sa maong mga Chinese nationals  apan igo lang nila kining gibadlong ug  gipapahawa butang nga gakidismaya ni Konsehal Abaday.

Gani, matod sa representante sa Mines and Geosciences Bureau sa Department of Environment and Natural Resources (DENR)  nga sa ilang gipahigayon nga pagsusi sa dapit ilang nakita nga aduna gayud timaan sa pagmina ang katuyuan niini.

Gikompirma usab ni Engr. Cuenca nga walay mining permit nga giisyu ang ilang buhatan sa pagpahigayon og mina  sa maong dapit. Niini, si Konsehal Abaday misugyot sa pagpahigayon og makuting imbestigasyon sa maong taho.