Tablon midonar og lote aron tukoran sa police station

GILANTAW nga  mahatagan sa hingpit nga seguridad sa kahusay ug kalinaw sa Barangay Tablon ning syudad.

Kini human ang konseho sa sesyon  kagahapon nga gidumala ni Bise Mayor Bebot Rodriguez misagop og resolusyon nga nag-aprobar sa ilang resolusyon nga naghatag katungod ni Kapitan Rome Bacarro pagpirma sa Deed of Donation sa loteng gipanag-yahan sa barangay nga nahimutang sa Purok 1 aron idonar ngadto sa Philippine National Police (PNP).

Nasayran nga ang maong lote nga adunay gilapdong 500 metros kwadrados gilarawng tukuran sa police station aron gamiton sa pagmonitor ug sa pagmintinar sa kahusay ug kalinaw sa Tablon ug sa kasikbit nga dapit.

Ang resolusyon  nga gisagop sa konseho alang sa maong katuyoan gipaluyohan sa komite sa barangay affairs ubos ni Konsehal Marlo Tabac ug komite sa pamalaod ug reglamento ubos ni Konsehal Ed Cabanlas. (JRG/SP)