Syudad seryoso sa kampanya paglimpyo sa mga merkado - Cabanlas

“KON atong malimpyo ang Cogon Public Market, kon atong malibre ang kadalanan palibot sa merkado, segurado ako nga mahimo nato kini sa ubang lugar sa syudad.”

Kini ang gibutyag ni Konsehal Edgar Cabanlas, majority floor leader atol sa sinemanang   programa sa City Information Office nga “Inyong Konseho Karon”.

Matod sa konsehal nga ang pagbutang sa mga paninda o’ baligya sa kadalanan kanunay nga illegal, pero tungod sa humanitarian nga rason gitugot ang parte sa dalan para sa mga gapaninda, pero ang problema kay dili sila gasubay sa mga reglamento nga giimposar sa syudad.

Gipasabot ni Cabanlas nga seryoso ang Syudad sa kampanya nga malimpyo ang mga merkado kini maoy tinubdan sa atong inadlaw-adlaw nga pagkaon.

Sa pagkakaron nalimpyo ug nahapsay na ang traffic diha sa Cogon Market ug sa Osmena Street, matod ni Konsehal Cabanlas.

Gisugyot sa konsehal ang presensya sa kapulisan aron sa pagmentinar sa maong dalan nga walay mga vendors ug ipabilin ang kadalanan nga walay babag alang sa publiko.

Niini, nagpasalamat si Cabanlas sa suporta sa buhatan sa City Economic Enterprises and Business Development Administration, Cagayan de Oro City Police Office, Night Market Committee ug sa mga Barangay Officials palibot sa Cogon Market, nga kanunay anaa sa panahon sa inspeksyon sa sulod ug sa kadalanan sa merkado nag-abag nga magmalamposon ang tanang gitinguha nga kaayohan sa tanan. (RNQ/SP)