Suzette nanawagan sa kabataan pagsumite na sa ilang rekisitos sa CSP

SI Konsehal Suzette Magtajas-Daba, Chairman sa Komite sa Edukasyon sa konseho, subling nagpahinomdum nga hangtod lamang karong Marso 15 ning tuig ang katapusang adlaw sa pagdawat sa mga rekisitos alang sa 2024 City Scholarships Program (CSP) sa dakbayan.

Matod sa konsehal nga gikinahanglan kompletohon gyud ang ilang mga rekisitos ayha isumite pinaagi sa link: bit.ly/ISDASubmitReq2024 aron makakuha sa qualifying exams kay ang maong link pagasirhan ug modawat taman lang gayud Marso 15.

Niini, si Konsehal Daba nag-aghat niadtong mga estudyante nga nagmalamposon sa ilang pag-apply online nga mosumite na kay talagsaon kini nga kahigayonan nga gitanyag sa kagamhanan sa tinguha nga walay kabataang mapihig sa de kalidad nga edukasyon ug makakab-ot sa gidamgong kurso alang sa mahayag nga kaugmaon.

“Alang sa dugang detalye ug impormasyon,mahimong mobisita sa FB page sa CdO City Scholarships Office,”dugang pamahayag ni Konsehal Daba.