Suzette mipasalamat sa malampusong Career Expo 2022

SI Konsehal Suzette Magtajas-Daba, chairman sa Komite sa Edukasyon, mipahalipay sa tanang Iskolar sa Dakbayan (IsDa) nga misalmot sa gipahigayong duha ka adlaw nga Career Expo 2022 diha sa Ayala Centrio Mall, ning syudad.

Kini human nasayran sa konsehal nga ubay-ubay sa mga migradwar nang iskolar ang direktang nahatagan sa kahigayonan nga makapanarbaho.

Ang kalihokan nga gimugna sa kagamhanan dako gyud og ikatabang dili lang sa pag-angkon sa pangandoy sa kabataan kun dili lakip na paghatag og dugang kaarangan sa kinabuhi sa ilang tagsa tagsa ka pamilya, pamahayag ni Konsehal Suzette.

Siya midugang nga kun produktibo ang matag molopyo sa komunidad dali lang mga maangkon ang kalamboan.

Sinugdanan na kini sa ilang dakong kalampusan sa ilang napiling career ug katumanan sa programa sa kagamhanan nga ang paglantaw mao nga walay kabataang mapihig pag-angkon sa ilang mga damgo, dugang sa konsehal.

Niini, si Konsehal Suzette Magtajas-Daba miagni sa mga iskolar nga ampingan ang naangkong kahigayonan aron dili mapasa ang kapobrehon sa sunod nga henerasyon.