Sugyot pagtukod og bag-ong fish landing sa Bonbon gisuportahan ni Tabac

Dako kini nga kalamboan sa barangay ilabina sa atong mga fisherfolks.

Kini ang gibutyag ni Konsehal Marlo Tabac, chairman sa komite sa barangay affairs, human giuyonan sa konseho sa sesyon niadtong Lunes nga gidumala ni Bise Mayor Bebot Rodriguez ang ordinansa nga nagtugot ni Mayor Rolando A. Uy sa pagpirma sa detalyadong subdivision plan alang sa tukorong fish landing ug fish port facility diha sa Barangay Bonbon.

Ang pasilidad gilauman sa pagpahapsay sa pag-abot ug pagproseso sa mga preskong kuha sa mga mananagat, pagmugna og mga oportunidad sa panarbaho, pagpalig-on sa seguridad sa pagkaon, ug dugang kalamboan sa komunidad.

Matod sa konsehal nga sa pagtukod sa maong facilidad mahatagan og saktong kadunggoan sa ilang mga pump boat ang mga mananagat human sila managat diha sa Macajalar Bay.

Niini kusganong gisuportahan ni Konsehal Tabac ang maong sugyot  kay dako kini nga kalamboan diha sa barangay. (RNQ/SP)