Suan nagpasalamat sa mga magtutudlo atol sa World Teachers Day

MAPASALAMATON nga gihanduraw ug gipasidunggan ni Konsehal Aga Suan, minority floor leader sa konseho, ang tanang mga magtutudlo ug edukador atol sa bag-ohay lamang nga kasaulogan sa World Teachers’ Day.

Karong tuiga, ang selebrasyon adunay tema nga “Standing with teachers: 60 years of protecting the profession, advancing its status and shaping our futures” (Pagbarog uban sa mga Magtutudlo: 60 ka Tuig sa Pagpanalipod sa Propesyon, Pag-asdang sa Ilang Kahimtang, ug Paghulma sa Atong Kaugmaon).

Gihulagway ni Konsehal Suan ang mga magtutudlo isip mga "tinuod nga bayani" sa katilingban tungod sa ilang walay puas nga sakripisyo ug dedikasyon sa pag-umol sa hunahuna ug kaugmaon sa mga kabatan-onan.

"Dako ang atong utang kabubut-on sa atong mga magtutudlo. Sila ang naghatag og inspirasyon sa mga damgo ug nagtukod sa pundasyon sa atong komunidad," sumpay sa konsehal.  (RNQ/SP)