Suan nagpasalamat sa dinaliang solusyon sa problema sa pagbaha

Kusganong nagpasalamat si Konsehal Aga Suan, minority floor leader sa Konseho sa Syudad sa daling pagtubag sa problema sa pagbaha sa may junction sa fly-over diha sa Barangay Carmen.

Kini ang gipadayag sa konsehal atol sa miaging tigom sa komite sa public works nga gidumala ni Konsehal Al Legaspi, Sr. human nadungog ang representante sa buhatan sa City Engineers nga anaa na ang plano alang sa pagtukod og gamay nga kanal sa maong dapit aron naay magawasan sa tubig lahos ngadto sa ubos nga bahin sa may West City Central School.

Mahinumdoman nga si Konsehal Suan mihatag sa iyang special report sa milabayng sesyon sa konseho kabahin sa pagbaha sa maong dapit panahon sa kusog nga ulan ug nakahasol sa mga motorista. (RNQ/SP)