Suan nagdasig sa pet owners pagpahimulossa ‘Oplan Bakuna Kontra Rabies sa Barangay’

KUSGANONG gisuportahan ni Konsehal Aga Suan, minority floor leader sa Konseho, ang gipakusgang kampanya sa kagamhanang lokal nga "Oplan: Bakuna Kontra Rabies sa Barangay" aron masiguro ang kaluwasan sa komunidad batok sa makamatay nga virus.

Ang maong programa gipasiugdahan sa City Veterinary Office ubos sa panguna ni City Veterinarian Dr. Helen Ann Tacandong. Tumong niini nga mapaduol ang libreng serbisyo sa pagbakuna sa mga binuhing iro ug iring diha sa kabarangayan aron dili na mo-adto ang mga pet owners sa buhatan sa City Vet alang sa maong serbisyo.

Nasayran sa konsehal ang malampusong pagpahigayon sa libreng pagpamakuna niadtong Lunes sa hapon, Oktubre 26, diha sa Barangay Consolacion, diin daghan pet owners ang nagpabakuna sa ilang mga binuhi.

Tungod sa maong kalamposan, ang City Vet magpahigayon sa laing hugna sa libreng pagpamakuna diha sa Barangay Hall karong Miyerkules sa buntag, Oktubre 28, 2026, diin ang mga lumulupyo gikan sa Marcos Bridge, Corner Manuel Vega, ug District 3 Isla Cupa ang mahatagan sa kahigayonan sa maong libreng pamakuna.

Subay niini, gi-awhag ni Konsehal Suan ang mga pet owners nga seryosohon ang ilang responsibilidad.

Matod pa niya, ang pagpabakuna sa mga hayop usa ka dako nga lakang aron mapanalipdan dili lang ang mga binuhing hayop, kon dili lakip na ang tibuok pamilya ug ang mga silingan sa komunidad.

"Pinaagi sa atong pagtinabangay, padayon kitang naglakang paingon sa mas luwas ug hingpit nga 'Rabies-Free Cagayan de Oro,” sumpay ni Konsehal Suan. (RNQ/SP/Photo credit: Elvie Mangmang FB account)