IP celebration gipangandaman -Konsehal Cabaring

MALAMPUSONG gihimo ang usa Technical Working Group (TWG) Meeting tali sa mga Datu, Bae, ug mga koordinador sa sayaw sa nagkadaiyang barangay sa dakbayan  sa milabayng semana diha sa Session Hall sa konseho.  

Ang maong tigom kabahin sa hugot nga pagpangandam alang sa umaabot nga Indigenous Peoples (IP) Month Thanksgiving Celebration nga gipangunahan  ug gisuportahan sa buhatan ni City Indigenous Peoples Mandatory Representative (IPMR) Konsehal Roberto "Datu Makilala" P. Cabaring.

Tumong sa maong panagtigom nga planohon sa maayo ang mga kritikal nga detalye sa selebrasyon aron mas mapasundayag ang adunahang kultura, tradisyon, ug katungod sa mga lumadnong komunidad sa siyudad.

Mahinumdoman nga nagpadala og tagsa-tagsa ka opisyal nga representante ang matag barangay aron masiguro nga madungog ug maihap ang tingog sa matag lokalidad sa tibuok proseso sa pag-organisa.

Gawas sa kinatibuk-ang preparasyon, gisusi usab sa mga koordinador ang mga sumbanan ug mechanics sa ipahigayong "Sayaw Hu Tagbatasan" Cultural Dance Competition.Gihimo kini aron masiguro ang hapsay nga dagan sa kompetisyon ug ang pag-andam sa matag delegasyon nga mopakita sa ilang tradisyonal nga sayaw.

Si Konsehal Cabaring, kinsa nailang kampiyon sa katungod sa mga lumad sa dakbayan, nagkanayon nga ang lokal nga kagamhanan sa Cagayan de Oro nagpabilin nga abri ug andam sa paghatag sa tanang gikinahanglan nga suporta aron magmalampuson ang maong kalihokan ug mapanalipdan ang kultural nga kabilin sa mga lumad. (JRG/SP)