Suan misuporta sa polio vax drive

“DILI matambalan apan pwedeng mapugngan”.

Kini ang gihatagan og gibug-aton ni Konsehal Aga Suan, minority floor leader, sa iyang pagpaluyo sa labing bag-ong kampanya sa City Health Office batok sa sakit nga polio.

Kini human nakig-alayon ang kagamhanang lokal sa dakbayan pinaagi sa buhatan sa CHO sa tibuok kalibotang pagsaulog sa World Polio Day niadtong Oktubre 24.

Ang maong lakang nagtumong sa pag-awhag sa publiko nga suportahan ang immunization program sa gobyerno aron mahimong polio-free ang syudad.

Bisan pa man nga walay tambal ang polio, nagtuo ang konsehal nga kini epektibong mapugngan pinaagi sa bakuna.

Gipahinumdoman ni Konsehal Suan ang publiko nga ang bakuna mao ang nag-unang taming aron malikayan ang permanente nga pagka-lulid o kamatayon nga dala sa polio.

Tungod niini, giawhag sa konsehal uban sa CHO ang mga ginikanan ug ang tibuok komunidad sa pagsiguro nga mabakunahan ang mga bata sa tanang rekomendadong doses sa polio vaccine.

Gawas sa immunization drive, gidasig usab ang katawhan sa pagbaton sa disiplina sa kalimpyo: sama sa paghugas sa kamot gamit ang sabon ug limpyong tubig; pagseguro nga limpyo ang imnong tubig ug hustong pagkaluto sa pagkaon ug pagmintinar sa saktong sanitasyon sa sulod ug gawas sa panimalay.

Pinaagi niini nga kooperasyon, malaumon si Konsehal Suan nga magpabiling luwas, himsog, ug gawasnon sa polio ang tibuok dakbayan sa Cagayan de Oro. (RNQ/SP/Photo credit: Mindanao Daily News)