Suan misugyot nga humanon una nasugdang mga projects sa syudad

"I WOULD offer respectfully my objection.”

Kini ang pamahayag ni Konsehal Aga Suan, minority floor leader sa konseho atol sa miaging regular sesyon nga gidumala ni Bise Mayor Bebot Rodriguez, aron ipadayag ang iyang pagsupak sa resolosyon nga mag-authorize sa Mayor pag-negotiate sa mga financial institution alang sa ₱8.5-bilyon nga loan aron gamiton pagtukod sa bag-ong City Hall ug Government Complex diha sa Upper Carmen.

Mahinumduman nga usa si Konsehal Suan sa tulo ka mga sakop sa minoriya—uban ni Konsehal Yvy Emano ug Konsehal Imee Rose Moreno—nga mibotar og "No" sa maong resolusyon.

Giila sa konsehal ang maayong katuyoan sa proyekto alang sa kaayohan ug modernisasyon sa serbisyo sa gobyerno, apan iyang gipasabot nga ang maong lakang usa ka dakong pinansyal nga risgo nga posibleng magbilin og bug-at nga obligasyon ug interes sa panudlanan sa siyudad.

“Kon mahimo, ato kining i-phase o bahin-bahinon ang pag-utang ug pag-implementar sa proyekto, kay pinaagi niini, maminusan ang pinansyal nga risgo ug dili dungan nga mabug-atan sa interes ang atong siyudad,” pamahayag sa konsehal.

Dugang pa ni Suan nga daghan pa kita og mga infrastructure projects nga nasugdan na, apan nagpabiling wala pa nahuman, sama sa Macanhan Health Center.

Matud niya, mas makiangayon nga unahon una paghuman ang mga pending projects sa dili pa mosulod sa laing dako nga obligasyon sa utang. (RNQ/SP)