Suan misugyot hatagag ayuda mga apektado kaayo sa MECQ


Atong tabangan ang atong kaigsoonan nga apektado human gipailawom ang dakbayan sa Modified Enhanced Community Quarantine (MECQ).

Kini ang panawagan ni konsehal Lordan Suan atol sa sesyon sa Konseho niadtong Lunes nga gidumala ni Bise Mayor Kikang Uy.

Gibutyag sa konsehal nga hinay ang dagan sa ekonomiya karon kay daghang establisemento ang wala gitugotan sa pag-abri subay sa gabayan sa MECQ nga gisitar sa IATF tungod sa pagsaka sa kaso sa Covid-19 dinhi sa syudad.

Busa daghan ang naundang sa ilang trabaho ug nawad-an sa kinitaan ug panginabuhian.

Dugtong ni Konsehal Suan nga dili na tiaw ang gibati nga kalisod sa katawhan sa dakbayan. Ang uban nagdiskarte na lang intawon kay daghan silang nagpuyo sa ilang tagsa-tagsa ka panimalay ug nagsalig lamang sa ilang pang adlaw-adlaw nga kinitaan.

Niini, si Konsehal Suan hugot nga mihangyo sa kagamhanan ug sa nagkalain-laing ahensya nasyonal sama sa DILG ug DSWD nga makakita og mga pamaagi nga mahatagan sa ayuda ang katawhan sa dakbayan tungod sa gisagubang nga kalisod dala sa pandemya.

Ang maong taho giduso ni bise mayor kikang Uy ngadto sa komite sa panalapi ni Konsehal Edna Dahino, sa komite sa panglawas ni Konsehal Malou Gaane ug sa komite sa social services ni Konsehal Girlie Balaba alang sa dugang pagtuon ug dali nga aksyon.