Students’ rights, welfare code giuyonan sa konseho

GILANTAW nga mapalig-on ang katungod sa mga estudyante sa dakbayan sa Cagayan de Oro.

Kini human hiniusang giuyonan sa Konseho sa Syudad, sa sesyon niadtong Lunes nga gidumala ni Bise Mayor Bebot Rodriguez, ang ordinansa nga nagmugna sa Comprehensive Code for the Students’ Rights and Welfare (StRaW) sa dakbayan sa Cagayan de Oro.

Si Konsehal John Michael Seno, Chairman sa Komite sa Sports and Youth Development ug usa sa nagpaluyo sa ordinansa, mipasabot sa kamahinungdanon sa maong balaod sa tinguha nga makapadayag og kagawasan sa pagpamahayag ang mga tinun-an.

Niini, kusganong gipasalamatan sa konsehal uban ni Konsehal Suzette Magtajas-Daba, Chairman sa Komite sa Edukasyon, ang tanang miabag sa pagpanday sa balaod.

Kini naglakip sa kadagkoan sa Oro Youth uban sa pag-abag ni kanhi IBP President-Misamis Oriental Chapter Atty. Katrina Mordeno, Commission on Human Rights Regional Director - 10 Atty. Jeanne Ivy Abrina, City DILG Director Engr. Jane Docallos, ug pipila ka mga namunoan sa nagkadaiyang tunghaan sa dakbayan ug mga hintundang ahensya sa gobyerno.

Ang ordinansa alang sa maong katuyoan gipaluyohan usab sa Komite sa Pamalaod ni Konsehal Edgar Cabanlas.