Street light, water system prioridad sa Tumpagon

HINGPIT nang mahayagan ug makutayan sa linya sa tubig ang katibuk-ang bahin sa Barangay Tumpagon.

Kini human ang konseho sa sesyon niadtong Lunes nga gidumala ni Bise Mayor Bebot Rodriguez misagop og resolusyon nga nag-uli sa ordinansa  sa maong barangay nga may kalabutan sa ilang 2025 Annual Budget nga adunay banabanang kinitaan ug galastohon  balor P5,869,245 gikan sa Enero ngadto sa Disyembre.

Tipik  sa gipundohan ug gihatagan prioridad sa  maong budget ang pag-instalar og street light system sa kinatibuk-ang bahin sa barangay, pag-instalar sa water system ingon man ang pagtukod og multi-purpose hall ug agricultural storage.

Samtang gigahinan  usab sa barangay og igong pundo  pagpalit og calamity-related supplies nga magamit panahon sa kalamidad ug igong pundo alang sa youth development program.

Ang resolusyon nga gisagop sa konseho alang sa maong katuyoan gipaluyohan sa komite sa barangay affairs ni Konsehal Marlo Tabac ug komite sa pamalaod ug reglamento ubos ni Konsehal Ed Cabanlas. (JRG/SP)