Solidwaste mgmt program sa Brgy 33 mapatuman na

HAYAN mahapsay na ang pagbahin bahin sa mga basura nga makolekta sa Barangay 33.

Kini human ang Konseho sa sesyon niadtong Lunes nga gidumala ni Bise Mayor Kikang Uy misagop sa resolusyon nga nag-uli sa ordinansa sa barangay nga nagpatuman sa ilang Solid Waste Management Program ug nagpahamtang sa multa sa masapong makasupak niini.

Giingon nga ang pagpataka og labay sa basura sa mga kabalayan, commercial, industrial ug ubang institusyon maoy hinungdan sa kahugaw sa palibot.

Ang ordinansa ipatuman sa tanang kabalayan, commercial establishments sama sa restaurants, eateries, department stores, groceries, sari sari stores, auto repair shops, mga institusyon sama sa banko, clinics, mga tunghaan, simbahan, pribado ug publikong buhatan ug tanang matang sa patigayon nga nahisakop o nag-operate sulod sa teritoryo sa barangay.

Si Konsehal Yan Lam S. Lim, chairman sa Komite sa Barangay Affairs mibutyag nga dalaygon kaayo ang maong ordinansa tungod kay dako og ikatabang nga mamintinar ang kalimpyo sa ilang dapit ug maplastar ang paglabay sa mga basura.

Ang resolusyon nga gisagop sa konseho alang sa maong katuyuan gipaluyuhan sa Komite sa Barangay Affairs ni Konsehal Lim ug Komite sa Pamalaod ni Konsehal Ian Mark Nacaya.