SK budget sa Brgy. 2 ug Mambuaya, giaprobahan

ATOL sa sesyon niadtong Lunes nga gidumala ni Presiding Officer Pro Tempore Konsehal Romeo V. Calizo, mayoryang giaprobahan sa konseho sa dakbayan ang resolusyon alang sa 2025 annual budget sa Sangguniang Kabataan (SK) sa Barangay 2 ug Barangay Mambuaya.

Ang budget sa Brgy. 2 adunay gibanabanang kinitaan ug galastuhon nga nagkantidad ₱352,352.00, samtang ang budget sa Brgy. Mambuaya nagkantidad og ₱1,052,659.00.Gipahimutang ang pondo sa nagkadaiyang inisyatibo nga nagtinguha sa pagpalambo sa kabatan-onan.

Dako nga bahin sa budget sa Brgy. 2 ang gitumong alang sa mga programa sa panglawas, kalikopan, maayong panggobyerno, edukasyon, ug aktibong pagpanginlabot sa komunidad.

Sa Brgy. Mambuaya, gawas sa nahisgotang mga aspeto, gihatagan usab og pagtagad ang agrikultura, social inclusion, ug equity.Nagpahigayon usab sila og alokasyon alang sa honorarium sa mga SK officials ug sa mga kinahanglanon sa ilang buhatan, sama sa supply sa opisina, kontribusyon sa SK Federation, fidelity bond premium, ug travel expenses.

Ang budget gikuha gikan sa 10% sa kinatibuk-ang pundo sa barangay, subay sa mandato sa Republic Act 10742 o ang Sangguniang Kabataan Reform Act of 2015, nga nagtumong sa pagpalig-on sa sektor sa kabatan-onan.

Kini gipaluyohan sa Komite sa Sports and Youth Development nga gipangulohan ni Konsehal Kenneth John Sacala ug Konsehal Yvy Emano, myembro sa komite. (SPEscoltos/SP)