SK Annual Budget sa Brgy. 32 giuyonan sa konseho


HINGPIT nang mapatuman ang mga programa ug proyekto nga gilantawng maghatag dugang kaarangan sa kinabuhi sa kabatan-onan sa Barangay 32 ning syudad.

Kini human ang konseho sa syudad ubos ni Bise Mayor Kikang Uy sa sesyon niadtong Lunes misagop sa resolosyon nga nag-uli sa ordinansa diin nasukip ang gisumeteng Sangguniang Kabataan 2021 Annual Budget balor P415,328.

Ang maong pundo gamiton sa pagpatuman sa ilang mga programa ug proyekto nga gihatagan og prayoridad ning tuiga subay sa mandato sa RA 10742 kon Sangguniang Kabataan Reform Act of 2015.

Lakip sa gipundohan sa maong budget ang pagproteher sa kinaiyahan, pagpalambo sa paugnat kosog kon sports, pagpamalit og mga ekipo og materyales alang sa COVID-19 response ug uban pa.

Si Konsehal John Michael Seno, chairman sa komite sa Sports & Youth Development kinsa usa sa nagpaluyo sa gisagop nga resolusyon miingon nga hugot niyang gisuportahan ang maong lakang human nakita nga nahisubay kini sa balaod ug dako ang ikatabang alang sa kaarangan og kalamboan sa mga kabatan-onan.

Ang resolusyon nga gipalabang sa konseho alang sa maong katuyuan gipaluyohan usab sa komite sa Barangay Affairs ni Konsehal Yan Lam Lim ug komite sa Pamalaod ni Konsehal Ian Mark Nacaya.