SK annual budget sa 5 brgys giuyonan sa konseho

MAPATUMAN na sa mga opisyal sa Sangguniang Kabataan sa lima ka mga barangay sa dakbayan ang ilang mga programa ug proyekto.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez mipasa sa mga resolusyon nga nag-aproba sa tagsa-tagsa ka ordinansa sa Barangay 10, Agusan, Bugo, Bulua, ug Indahag alang sa ilang Sangguniang Kabataan 2024 Annual Budget.

Ang maong budget naglangkob sa kinitaan ug galastohon balor ₱378,598.00 alang sa Barangay 10; ₱2,487,323.00 sa Barangay Agusan; ₱3,807,809.00 sa Barangay Bugo; ₱4,200,566.00 alang sa Barangay Bulua; ug balor ₱2,085,761.00 sa Barangay Indahag.

Lakip sa gihatagan sa prayoridad sa lima ka barangay ang pagpamalit og mga ekipo alang sa ilang buhatan, mga programa sa kabatan-onan mahitungod sa panglawas, edukasyon, kinaiyahan, active citizenship, pagdumala, ug uban pa.

Ang mga resolusyon nga gisagop sa konseho alang sa maong katuyuan gipaluyohan sa Komite sa Sports & Youth Development ni Konsehal Kenneth John Sacala ug Komite sa Pamalaod ni Konsehal Edgar Cabanlas.