SK Annual Budget sa 4 brgys giaprobahan

GILANTAW nga labing mapalambo pa ang mga programa ug proyekto  sa sektor sa kabatan-onan  sa upat ka barangay ning syudad.

Kini human ang konseho sa syudad sa sesyon niadtong Lunes nga gidumala ni Bise Mayor Bebot Rodriguez misagop sa upat ka managlahing mga resolusyon nga nag-uli sa tagsa tagsa ka resolusyon  sa Barangay Consolacion, Patag, 10 ug 24 nga may kalabotan sa ilang SK 2025 Annual Budget.

Kini naglangkob sa SK budget sa Consolacion  balor P1,969,660., P2,475,358.00  sa Barangay Patag, P405,542.00 sa Barangay 10 ug P1,496,808.00 alang sa Barangay 24 nga gamiton sa pagpatuman sa mga programa ug proyekto  sa kabatan-onan nga gihatagan og prayoridad sa kasamtangang tuig subay sa probisyon sa RA 10742 kon Sangguniang Kabataan Reform Act of 2015.

Tipik sa ilang gihatagan sa prioridad ang pagtul-id sa ilang mga ekipo, pagpalit og desktop computer, printer ug projector nga magamit sa ilang buhatan, pagpahigayon sa mga programa alang sa edukasyon, panglawas, pagproteher sa kinaiyahan, paghatag gahum sa ekonomiya, aktibong pagkalungsunaron, gender sensitivity, anti drug abuse ug uban pang mga programa nga gilantawng maghatag kaarangan sa ilang  itunol nga serbisyo  ngadto sa ilang ginsakopan.

Ang mga resolusyon nga gisagop sa konseho alang sa maong katuyoan gipaluyohan sa komite sa sports and youth development ni Konsehal Kenneth John Sacala ug komite sa pamalaod og reglamento ni Konsehal Edgar Cabanlas. (RNQuiblat/SP)