SK Annual Budget sa 3 brgys giuyunan sa konseho

MAPATUMAN na sa hingpit sa mga opisyal sa Sangguniang Kabataan sa tulo ka mga barangay sa syudad ang ilang mga programa ug proyekto nga gilantaw’ng maghatag og dugang kaarangan sa kinabuhi sa kabatan-onan.

Kini human ang konseho sa syudad sa sesyon niadtong Lunes nga gidumala ni Bise Mayor Kikang Uy mipasaka sa mga resolosyon nga nag-uli sa tagsa tagsa ka ordinansa sa Barangay 19, Balubal ug Macasandig diin nasukip ang ilang Sangguniang Kabataan 2021 Annual Budget.

Ang maong budget naglangkob sa gibanabanang kinitaan ug galastohon nga mobalor og P281,918.00 alang sa Barangay 19; P663,603.00 sa Barangay Balubal ug P2,235,937.00 sa Barangay Macasandig.

Ang maong mga pundo gamiton sa pagpatuman sa ilang tagsa-tagsa ka programa ug proyekto nga gihatagan og prayoridad niining tuig subay sa probisyon sa RA 10742 kon Sangguniang Kabataan Reform Act of 2015.

Lakip sa gipundohan sa budget mao ang mga programa sa pagpalambo ug paghatag og gahum sa kabatan-onan (SK Youth Development and Empowerment Programs), pagproteher sa kinaiyahan, pagpalambo sa paugnat sa kusog, pagpamalit og mga laptop og projector, ug uban pa.

Si Konsehal John Michael Seno, chairman sa komite sa Sports and Youth Development, kinsa usa sa nagpaluyo sa gisagop nga resolusyon mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa kaarangan og kalamboan sa mga kabatan-onan.

Ang resolusyon nga gipalabang sa konseho alang sa maong katuyoan gipaluyohan usab sa komite sa pamalaod ni Konsehal Ian Mark Nacaya.