top of page

SK Annual Budget sa 2 brgys giaprobahan

MAPATUMAN na sa hingpit sa mga opisyal sa Sangguniang Kabataan sa duha ka mga barangay sa syudad ang ilang mga programa ug proyekto nga gilantaw’ng maghatag og dugang kaarangan sa sektor sa kabatan-onan.

Kini human ang konseho sa syudad sa sesyon niadtong Lunes nga gidumala ni Bise Mayor Kikang Uy misagop sa duha ka mga resolosyon nga nag-uli sa tagsa tagsa ka ordinansa sa Barangay 14 ug 17 nga may kalabotan sa ilang SK 2021 Annual Budget.

Ang maong budget naglangkob sa gibanabanang kinitaan ug galastohon nga P338,646.00 alang sa Barangay 14 ug P421,156.00 sa Barangay 17.

Ang maong mga pundo gamiton sa pagpatuman sa mga programa ug proyekto nga gihatagan og prayoridad niining tuig subay sa probisyon sa RA 10742 kon Sangguniang Kabataan Reform Act of 2015.

Lakip sa gipundohan sa budget mao ang mga programa sa pagpalambo ug paghatag og gahum sa kabatan-onan (SK Youth Development and Empowerment Programs), pagpatuman sa mga proyekto sa imprastraktura, pagpamalit og mga ekipo alang sa ilang buhatan, ug uban pa.

Si Konsehal John Michael Seno, chairman sa komite sa Sports and Youth Development, kinsa usa sa nagpaluyo sa gisagop nga resolusyon mipadayag sa iyang suporta sa maong lakang human nakita nga nahisubay kini sa balaod ug dako ang ikatabang alang sa kaarangan ug kalamboan sa mga kabatan-onan.

Ang resolusyon nga gipalabang sa konseho alang sa maong katuyoan gipaluyohan usab sa komite sa pamalaod ni Konsehal Ian Mark Nacaya.



bottom of page