SK-10 centers for youth participation sa Lapasan mapatuman na

MALAUMON si Konsehal Kenneth John Sacala, chairman sa komite sa youth and sports development sa konseho, nga labi pang mapalapdan ang  programa sa Sangguniang Kabataan sa Barangay Lapasan.

Kini human giuyonan sa konseho sa  sesyon kagahapon  nga gidumala ni Bise Mayor Bebot Rodriguez  ang resolusyon nga nag-uli sa Resolution No. 06-2025 sa Sangguniang Kabataan sa Lapasan nga may kalabutan sa ilang 2025 Annual Budget nga mokabat og P5,517,864 alang sa hingpit nga implementasyon.

Sa maong budget, maoy gihatagan og prioridad ang  SK 10- Centers for Youth Participation nga gilangkoban sa  health, education, economic empowerment, social inclusion  and equity, peace building and security, governance, active citizenship, environment ug  global mobility, mga programa  nga dunay partisipasyon  sa mga batan-on sa ilang dapit.

Nasayran ang maong budget  miagi sa makuting pagtuon ug dileberasyon sa mga komite sa konseho ug nasuta nga mahimo nang ipatuman sa labing dali nga panahon.

Ang resolusyon nga gipalabang sa konseho alang sa maong katuyoan gipaluyohan sa komite sa youth ni Konsehal Sacala ug komite sa pamalaod ug reglamento ubos ni Konsehal Edgar Cabanlas. (JRG/SP)