Sitio Camansi, Catanicomakabaton og linya sa kuryente dili madugay

Hayan makutayan na og linya sa kuryente ug hingpit nga makasinati og kahayag ang Sitio Camansi, Barangay F.S. Catanico, ning syudad.

Kini human gilagdaan sa kagamhanan sa dakbayan ang Memorandum of Agreement (MoA) tali sa Rotary Club of Kalayaan Cagayan de Oro alang sa electrification project balor P967,306.41 alang sa Camansi Elementary School.

Mahinumdoman nga nagtukod ang syudad ug bag-ong gambalay ug gitunol niadtong Enero 2020 sa tingoha nga walay kabataan nga mapihig sa serbisyo ug makaangkon sa maayong edukasyon.

Si konsehal Suzette Magtajas-Daba, chairman sa komite sa edukasyon mibutyag nga importante kaayo kini nga proyekto dili lamang sa maong tunghaan apan sa tibook komunidad sa dapit kay maghatag kinig oportunidad sa kapanginabuhian sa katawhan.

Ang akong hugot nga pasalamat sa Rotary Club of Cagayan de Oro sa pag-abag pinaagi sa pagdonar og P600 mil alang sa maong proyekto, sa kagamhanan ubos ni Mayor Oscar Moreno nga kanunay naghatag suporta sa natad sa edukasyon ug sa DepEd-10 sa panguna ni Schools Division Superintendent Doc. Cherry Limbaco sa dakong kalamposan sa proyekto, panapos nga pamahayag ni konsehal Suzette Magtajas-Daba.