Seno nangusog matul-id dalan dihas Camaman-an

NANGUSOG si Konsehal John Michael Seno, Chairman sa Komite Public Works, nga subling masemento ang dalan gikan sa kanto sa Carmelite-Hayes paingon sa Imburnal sa Camaman-an.

Kini human gisusi sa komite sa milabayng adlaw ang dapit uban sa mga representante sa City Engineering Office (CEO) ug Department of Public Works and Highways (DPWH-10).

Nasuta nga labihan na ka daut ang maong dalan ug angayan nang ilisan tungod kay sobrang nakahasol na sa mga motorista sa dapit.

Mahinumduman nga ang konseho sa Barangay Camaman-an una nang mipasaka og resolusyon nga naghangyo ni Mayor Klarex Uy ug sa Konseho nga matabangang matul-id ang maong dalan tungod sa mga reklamo gikan sa katawhan ug mga motorista.

Niini, ang komite gipaabot nga mopasaka sa resolusyon nga maghangyo sa DPWH ug CEO paghatag og prayoridad sa pagtrabaho sa maong dalan.