Seno misusi sa edipisyo sa House of Hope

Dako ang kahingawa ni Konsehal John Michael Seno, Chairman sa Komite sa Public Works, nga wala makompleto ang pagtrabaho sa edipisyo dinha sa House of Hope sa Barangay Lumbia. Kini human ang iyang komite mipahigayon og pagsusi sa dapit sa milabayng adlaw uban sa representante sa buhatan sa City Engineer (CEO) ug City Administrator (CAO).

Sa maong higayun, nakita sa konsehal ang kahimtang sa edipisyo ug nasayangan siya sa sapi nga gigasto sa gobyerno tungod kay wala mapusli ang edipisyo nga unta gikinahanglan man sa mga nalisoan sa ilang pangisip ug mga hamtong nga wala nay mga pamilya.

Nasayran nga ang maong edipisyo gisugdan pagtukod niadtong Disyembre 7, 2021 ug gitakda untang makompleto niadtong Nobyembre 7, 2022 apan giabandona sa kontraktor.

Matod ni Seno nga kun nakompleto ang proyekto sa gitakdang panahon hayan nagamit na kini ilabina nga nagpadayon ang problema sa mental health sa syudad.

Niini, si Seno mipasalig nga motabang ug maningkamot nga matibawas ang proyekto aron magamit ug mapuslan sa labing dali nga panahon, butang nga gikalipay sa mga nagdumala sa House of Hope.