Seno mipasalamat sa higayong nakasilbi sa katawhan sa CDO

“DAGHAN akong natun-an ug dili kabayran sa tinaginting sa salapi ang akong kahibalo dinhi sa hawanan sa konseho sa dakbayan sa Cagayan de Oro.”

Mao kini ang giluwatan ni kanhi SK Federation President Konsehal John Michael l. Seno, sa sesyon niadtong Martes nga gidumala ni Bise Mayor Bebot Rodriguez, human milingkod na sa iyang pangatungdanan si Konsehal Kenneth John D. Sacala, ang bag-ong napiling presidente sa SK.

Matod ni Seno nga talagsaon nga mahitabo nga usa ka yanong molopyo sa dakbayan mahatagan og higayon nga mangulo sa pederasyon sa kabatan-onan sulod sa tulo ka termino sa konseho ug iyang garbo nga nahimong Chairman sa Komite sa Public Works ug Komite sa Sports and Youth Development.

Niini, siya nanghinaut nga mas mapalambo pa ni Konsehal Sacala ang mga programa, proyekto ug kalihokan sa pederasyon dala ang sugyot nga unta matutokan ang programa kabahin sa mental health, teenage pregnancy ug gang wars dinhi sa syudad.

Kinasingkasing nga gipasalamatan ni Seno ang suporta sa iyang mga kauban sa konseho ubos ni Bise Mayor Bebot Rodriguez kay tungod kanila daghan siyang natun-an nga maghatag og dakong kalamboan sa iyang kinabuhi.