Seno miawhag maimbestigar pagkamatay sa batang gianak dihas Patag Health Center

SI Konsehal John Michael Seno hugot nga nanawagan sa pagpahigayon on imbestigasyon sa gikatahong pagkamatay sa usa ka bata samtang anaa pa sa sabakan sa inahan human matod pa nalangan pagpadala ngadto sa hospital.

Kini ang panaawagan sa konsehal atol sa sesyon sa Konseho niadtong Lunes nga gidumala ni Bise Mayor Kikang Uy.

Matod niya nga ang inahan makanunayong nagpaprenatal diha sa Patag Health Center apan pag-abot sa panahon nga manganak na gi-refer sa Patag Health Center ngadto sa Bulua Health Center ug ayha pa narefer sa hospital nga medyo apiki na ang sitwasyon ug giingong patay na ang bata samtang anaa pa sa sabakan.

Gibutyag ni Seno nga ikaduhang panghitabo na kini dinhi sa syudad nga namatyan og bata atol sa pagpanganak tungod sa giingong kalangan o kakulangon sa serbisyo diha sa Health Center.

Ang panawagan ni Seno giduso ni Bise Mayor Kikang Uy ngadto sa komite sa panglawas ni Konsehal Malou Gaane aron mahatagan sa katin-awan ug masolosyonan ang mga kakulangon.