top of page

Seno dismayado sa kalangan pagtibawas sa mga proyekto

DISMAYADO si Konsehal John Michael Seno, chairman sa Komite sa Sports and Youth Development, sa kadaghan sa mga proyekto sa imprastraktura nga wala matibawas sulod sa duha o’ tulo na ka tuig.


Sa sesyon sa Konseho niadtong Lunes nga gidumala ni Bise Mayor Bebot Rodriguez, si Seno mitaho sa mga proyektong gipatuman nga wala mahuman ug gibiyaan sa kontraktor sa walay igong rason.


Kini human nadawat sa konsehal ang accomplishment report gikan sa mga resident engineer sa buhatan sa City Engineers nga adunay kapin 100 ka proyekto sa imprastraktura sa syudad ang adunay isyu sa pagpatuman taliwala nga nahatagan na sa pasiunang bayad ang mga kontraktor.

Lakip sa gitumbok nga mga problema sa pagpatuman sa proyekto mao ang road right of way, walay kabutangan sa proyekto, kakulangon sa koordinasyon, structural analysis, soil suitability, ug uban pang mga hinungdan.


Matod ni Seno nga wala namatikdan ang maong mga kakulangon tungod kay walay ocular inspection gihimo sa Planning Division sa buhatan sa City Engineer ug ang mga resident engineer wala malantaw ang mga gipatumang proyekto kay kulang ang ilang buhatan og sakyanan nga magamit.


Niini, si Seno misugyot sa paggahin og igong pondo nga magamit pagpalit og motorsiklo aron mahimo ang ilang kaakuhan ug masusi ang mga proyekto. Gisugyot usab sa konsehal ang pagmugna og City Project Monitoring and Evaluation Team aron hingpit nga ma-monitor ang mga ipatumang proyekto aron malikayan ang pagpangonsabo.


Ang taho ni Seno giduso ni Bise Mayor Bebot Rodriguez ngadto sa Komite sa Public Works ni Seno ug Komite sa Pamalaod ni Konsehal Edgar Cabanlas alang sa makuting pagtuon ug rekomendasyon.

Opmerkingen


bottom of page