Selebrasyon sa Drug Abuse Prevention Month gisugdan na

PORMAL nga gisugdan pinaagi sa motorkada ang selebrasyon sa Anti-Drug Abuse and Control Month nga gisalmotan sa 80 ka barangay, mga buhatan sa local government unit, kapolisan ug uban pang partner agencies sa opisina sa Anti-Drug Abuse Division sa City Social Welfare Department.

Kini ang gipahibalo ni Konsehal Roger Abaday, chairman sa komite sa public order and safety, atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Abaday nga importanteng matuhop sa katawhan ang kabililhon sa maong pagsa-ulog agig pagpahinumdom ilabi na sa kabatan-onan nga likayan ang pagkalambigit sa ilegal nga druga gumikan kay dili kini makahatag og maayong paingnan sa kinabuhi sa tawo hinoon makaguba pa kini sa ilang kaugmaon.

Niini nagpasalamat si Konsehal Roger Abaday sa kooperasyon ug partisipasyon sa kabarangayan aron mahimong mabulokon ug mapatuman ang maong programa. (MLR/SP)