SB1 sa SK Tumpagon, giuyonan sa konseho

LABING gipalapdan sa Sangguniang Kabataan sa Barangay Tumpagon ning dakbayan ang ilang youth development and empowerment programs nga gilaumang maghatag kaayuhan sa  kabatan-onan sa ilang dapit.

Sa sesyon sa konseho niadtong Lunes nga gidumala ni Bise Mayor Bebot Rodriguez, hiniusang gisagop sa konseho ang resolusyon nga nag-uli sa resolusyon sa maong barangay nga may kalabutan  sa ilang Supplemental Budget No.1 nga mokabat sa P797,732 alang  sa implementasyon.

Ang maong supplemental budget alayon sa Section 20 sa Akta Republika 10742, JMC No.1, s-2019 ug ubang giya nga may kalabutan sa  paggamit sa pundo sa SK.

Tipik sa gipundohan sa maong SB ang programa  nga gilangkoban sa  edukasyon, governance, environment, active citizenship, economic empowerment ug agriculture.

Si Konsehal Kenneth John Sacala, SK federation president ug chairman sa komite sa youth and sports development, mipasabot nga iyang gisuportahan ang maong lakang tungod dako kini  og ikatabang sa kinabuhi  sa kabatan-onan sa maong barangay.

Ang resolusyon nga gipalabang sa konseho alang sa maong katuyoan gipaluyohan sa komite sa youth and sports development ug komite sa pamalaod ug reglamento ubos ni Konsehal Edgar Cabanlas. (JRG/SP)