SB1 sa Mambuaya giuyunan sa konseho

Mapadayon sa konseho sa Barangay Mambuaya ang pagtunol og serbisyo sa ilang ginsakopan sa nahabiling bulan ning tuig 2022.

Kini human ang konseho sa syudad sa sesyon niadtong Lunes nga gidumala ni Bise Mayor Jocelyn Rodriguez misagop sa resolusyon nga nag-uli sa ordinansa sa barangay diin nasukip ang ilang Supplemental Budget No. 1 nga mobalor og P699,260.00 alang sa hingpit nga pagpatuman.

Lakip sa gigahinan sa maong budget ang maintenance and other operating expenses sa barangay balor P283 mil kapin, pagpalit og emergency vehicle ug ubang programa ug proyekto nga magpalad sa serbisyo ngadto sa ilang katawhan.

Ang resolusyon nga gipalabang sa konseho alang sa maong katuyuan gipaluyuhan sa komite sa barangay affairs ni Konsehal Yan Lam Lim ug komite sa pamalaod ni Konsehal Ian Mark Nacaya.

Konseho mihangyo mabalhin Camp Evangelista, 4ID dihas Dansolihon

Ang konseho sa syudad ubos ni Bise Mayor Bebot Rodriguez kusganong mihangyo ni Presidente Bongbong Marcos nga makonsidera ang pagbalhin sa Camp Evangelista diin nahimutang ang 4th Infantry Division (4ID) gikan sa barangay Patag paingon sa barangay Dansolihon.

Sa sesyon niadtong Lunes, si Konsehal Romeo Calizo, chairman sa komite sa public order and safety ug usa ka retiradong heneral, mibutyag nga sa tanang kampo militar ang Camp Evangelista na lang ang dili na gayud matawag nga kampo.

Matod niya nga gumikan sa kapiot sa lugar wala nay luna ang kampo alang sa pagpahigayon og training ug impact areas. Gani, dili na angayan ang gigamit nga training ground alang sa firing ug nakaapekto na sa mga residente sa dapit.

Kun mabalhin sa Dansolihon, dako usab ang posibilidad nga masolosyonan ang problema sa insurgency sa Bukidnon, Lanao del Norte ug Cagayan de Oro, pasabot ni Calizo.

Siya midugang nga aduna nay laraw nga ibalhin ang Camp Evangelista. Ug kun kini mahinayon, mas maayo nga dinhi gihapon sa dakbayan sa Cagayan de Oro ug dili sa laing probinsya sa Mindanao.

Dugang niini, ang konseho mihangyo usab sa kadagkoan sa Armed Forces of the Philippines (AFP) ug 4th Infantry Division nga makonsidera ang pagbalhin sa kampo ngadto sa 100 ka hektaryang luna sa dakbayan sa Dansolihon.