Salcedo suportado ang dugang satellite terminal

GIPALUYOHAN ni Konsehal Eric Salcedo, chairman sa komite sa public utilities, ang sugyot nga magbutang og dugang satellite transport terminal sa syudad sa rason nga dako kini og ikatabang nga makapagaan ang problema sa trapiko sa dakbayan.

Ang maong pamahayag giluwatan ni Salcedo agig reaksyon sa special report ni Konsehal Roger Abaday atol sa sesyon niadtong Lunes nga gidumala ni Bise Mayor Bebot Rodriguez.

Sumala sa konsehal nga ang pagbalik sa operasyon sa East Bound Terminal sa Barangay Gusa ug planong pagbutang og dugang terminal sa Barangay Lumbia ug Barangay Puerto dako og makatabang nga maminusan ang kahuot  sa dagan sa trapik sa syudad. 

Ganii hugot nang gitun-an sa komite uban sa pag-abag sa opisina sa Roads and Traffic Administration (RTA) ug uban pang opisina sa goberno lokal ang pag-revise sa Traffic Code sa Dakbayan alang sa maong katuyoan, sumpay ni Salcedo.

Niini nagtuo si Konsehal Salcedo nga pinaagi sa pagtambayayong ug pagtinabangay sa mga publikong buhatan ug sa pribadong sektor mapangitaan og solusyon ang nagpabiling problema sa trapik sa syudad. (MLR/SP)