Salcedo nagtinguha ma-amendahan ang Traffic Code

GITINGUHA ni Konsehal Eric Salcedo, chairman sa komite sa public utilities, nga tun-an og ma-amendahan kun gikinahanglan ang Traffic Code diin ang ubang probisyon niini wala mapatuman.

Atol sa tigom sa komite niadtong milabayng adlaw, gihangyo ni Salcedo ang kadagkuan sa Roads and Traffic Administration nga sutaon ang Traffic Code sa tuyo nga mapagaan ang problema sa trapik sa syudad.

Niini gisugyot ni Engr. Nonito Oclarit, Department Manager sa Roads and Traffic Administration, ang Technical Working Group nga pagalangkuban sa City Administrator’s Office, City Engineering, Office of the Building Official, City Planning Department, City Legal Office, ug pribadong sektor pinaagi sa Cagayan de Oro Federation of Motorela Associations, Northern Mindanao Federation of Transport Service Cooperative, Cagayan de Oro Filipino-Chinese Community, Cagayan de Oro Chamber of Commerce and Industry Foundation, aron maoy mohimo ug aksyon ug rekomendasyon mahitungod sa maong isyu.

Nunot niini, malaumon si Konsehal Salcedo nga pinaagi sa hiniusang pagtuon ug rekomendasyon sa TWG, maduso ang resolusyon alang sa nasangpit nga katuyuan. (MLR/SP)