Salcedo misuporta sa lakang makansela giabandonang socialized housing units

GISUPORTAHAN ni Konsehal Enrico Salcedo, chairman sa komite sa Environment and Natural Resources, ang padayong pagpatuman sa kagamhanan sa Socialized Housing Program alang sa katawhang kabus.

Kini human si Konsehal Edgar Cabanlas, sa sesyon sa Konseho niadtong Lunes nga gidumala ni Bise Mayor Kikang Uy, mipahibalo nga kapin na sa 10 ka libong housing units ang natukod sa syudad nga gi-award ngadto sa mga biktima sa bagyong Sendong ingon man sa mga benepisaryo sa Piso Piso Program.

Gipasabot ni Cabanlas nga daghan untang pamilya nga nangindahay nga matagaan sa panimalay apan adunay 1,100 ka units ang gi-abandonar sa mga awardees ug dili makansela kay basin og makwetsyon ang legal nga basihan.

Tungod niini, nakisayod si Salcedo kun pila gayud ka pamilya sa syudad ang gikinahanglan nga marelokar aron mahibal-an ug mapangitaan sa pamaagi nga matunulan sa desenteng mga panimalay.