Salcedo misugyot pagtukod og Solid Waste Management Department

GISUGYOT ni Konsehal Eric Salcedo, chairman sakomitesa environment, sa pagtukod sa opisina sa waste control division isip bag-ong department sa City-Hall o’ ibulag kini gikan sa City Local Environment and Natural Resources Office ug pagatawgon nga Solid Waste Management Department.

Kini ang unod sa special report ni Konsehal Salcedo atol sa sesyon niadtong Lunes nga gidumala ni Bise Mayor Bebot Rodriguez.

Sumala ni Salcedo nga kini nga pamaagi maoy nakitang pinaka-epektibong solusyon aron matutokan ang pagdumala sa sanitary landfill diin nabutang ang hazardous waste treatment facility alang sa mga basura gikan sa mga hospital ug pag-monitor sa Material Recovery Facility sa kabarangayan.

Si Salcedo midugang nga panahon na nga ibulag ang waste control division tungod kay sa kadako sa syudad, dili magahum sa CLENRO ang pagtutok sa problema sa basura.

Ang maong sugyot giduso ni Bise Mayor Bebot Rodriguez ngadto sa komite sa environmental ang sa tukmang aksyon ug rekomendasyon. (MLR/SP)