Salcedo misugyot sa dugang alokasyon sa tag-P20 kilo sa bugas

GISUGYOT ni Konsehal Eric Salcedo, chairman sa komite sa public utilities, nga dugangan sa National Food Authority (NFA) ang alokasyon sa bugas alang sa syudad sa Cagayan de Oro.

Kini ang gipaambit nga reaksyon ni Salcedo sa gipadangat nga special report ni Konsehal Marlo Tabac atol sa sesyon niadtong Lunes nga gidumala ni Presiding Officer Pro Tempore Konsehal Roger Abaday mahitungod sa nasinati nga purwisyo sa katawhan nga buot mopalit sa tag P20 sa bugas diha sa National Food Authority.

Sumala ni Salcedo nga angayan lang nga himoon sa matag barangay ang pagbaligya aron han-ay ug dili na mapurwisyo ang katawhan ilabi na ang mga senior citizens.

Gani kon mahimo, madugangan ang suplay sa bugas aron daghan ang makapahimulos sa maong programa sa goberno, sumpay sa konsehal.

Siya midugang nga kulangon ang supply sa bugas nga gitagana sa syudad tungod kay limitado ang makapalit kumpara sa moabot sa 800 mil kapin nga populasyon sa katawhan sa syudad sa Cagayan de Oro.

Nunot niini, gisugyot ni Konsehal Eric Salcedo nga masukip sa mahangyo ang NFA sa pagdugang sa alokasyon sa bugas alang sa katawhan sa Cagayan de Oro. (MLR/SP)